بنگلورو،24 /دسمبر(ایس او نیوز؍آئی این ایس انڈیا) کرناٹک حکومت نے کہا کہ پہلے اعلان کردہ نظام الاوقات کے مطابق یکم جنوری سے دسویں اور بارہویں کی باقاعدہ کلاسز کا آغاز ہوگا۔

ریاستی حکومت کا یہ اعلان ایک ایسے وقت میں سامنے آیا ہے جب برطانیہ میں نئے قسم کے کورونا وائرس کے بارے میں خدشات بڑھ گئے ہیں۔ ریاستی حکومت نے اعلان کیا ہے کہ سرکاری اسکولوں کے ایک پروگرام کے تحت یکم جنوری سے دسویں، یونیورسٹی کے دوسرے سال (بارہویں) اور چھٹی سے نویں کلاسوں کی باقاعدہ تعلیم کا آغاز کیا جائے گا۔قابل ذکر ہے کہ ودیاگم اسکیم کا مقصد اسکول کی تعلیم کو ان دیہی طلبا کے گھر لے جانا ہے جو آن لائن کلاس نہیں لے سکتے ہیں۔

کرناٹک کے ابتدائی اور ثانوی وزیر تعلیم ایس سریش کمار نے کہا کہ باقاعدہ کلاسز شروع کرنا ان کے لئے وقار کی بات نہیں ہے، لیکن ان کے محکمہ کی ذمہ داری ہے کہ وہ سب کے لئے تعلیم کو یقینی بنائے۔عہدیداروں سے ملاقات کے بعد انہوں نے نامہ نگاروں کو بتایاکہ کلاسز یکم جنوری سے شروع ہوں گی۔ اس بارے میں گزشتہ دو دن سے قیاس آرائیاں جاری ہیں لیکن یکم جنوری سے ہم نے جو بھی پروگرام ترتیب دیا ہے وہ جاری رہے گا۔